Flott úrslit til HS Open
Bartal Eidesgaard og Elisabeth Erlendsdóttir svumu seg til kravtíðir til oyggjaleikirnar, meðan Thorborg Joensen og Tien Rasmussen svumu seg til talentnál á HS Open um vikuskiftið.
Svimjihøllin í Gundadali var um vikuskiftið karmur um HS Open. Hóast hetta var fyrsta heimliga kappingin eftir summarsteðgin, vóru longu fleiri góð úrslit at fegnast um.
Bartal undir tvær A-kravtíðir
Bartal Eidesgaard fekk eina sera góða byrjan upp á kappingarárið. Fríggjakvøldið svam hann 50 m bringu við tíðini 28.55 og kláraði harvið A-kravtíðina til oyggjaleikirnar komandi summar. Leygarkvøldið endurtók hann bragdið í 50 m frí, har tíðin 22.72 eisini var undir A-kravtíðini.
Elisabeth við persónligum meti og tveimum B-kravtíðum
Elisabeth Erlendsdóttir hevði eisini eina góða kapping. Í 50 m firvald svam hon við tíðini 28.64, sum bæði var persónligt met og undir B-kravtíðini til oyggjaleikirnar. Harumframt kláraði hon B-kravtíðina í 50 m frí við tíðini 27.12.
Talentnálir til Thorborg og Tien
Millum yngru HS-svimjararnar vóru eisini flott avrik. Thorborg Joensen, fødd í 2014, svam seg til talentnál í 50 m frí við tíðini 34.66.
Tien Rasmussen, føddur í 2012, svam seg somuleiðis til talentnál í 50 m frí við tíðini 31.74.
Úrslitini eru ein góð byrjan upp á kappingarárið og geva svimjarunum íblástur til venjingina og kappingarnar fyri framman.
Havnar Svimjifelag ynskir Bartali, Elisabeth, Thorborg, Tien og øllum í HS hjartaliga tillukku við flottu avrikunum!
Øll úrslitini á HS Open síggjast her: https://live.swimify.com/compe...