Andrias við sterkum úrslitum í Berlin
Andrias Mellemgaard úr Havnar Svimjifelag hevur hesar dagarnar luttikið í Para Swimming World Series í Berlin, har hann hevur staðið seg sera væl í sterkari altjóða kapping.
Longu fyrsta kappingardagin vísti Andrias góða framgongd. Hann svam fyrst 100 metrar frí upp á 1.09.98, sum var ein betring upp á 3,67 sekund í mun til tilmeldingartíðina á 1.13.65.
Síðani svam hann 100 metrar bringu upp á 1.28.48. Eisini har betraði hann seg, hesaferð við 0,64 sekundum í mun til tilmeldingartíðina á 1.29.12.
Framgongdin helt fram, tá Andrias svam 200 metrar blandað. Hann kom á mál við tíðini 2.58.92 og betraði sostatt sítt gamla persónliga met, sum var 3.06.92. Talan er um eina framgongd á heili 8 sekund.
Við á ferðini í Berlin er venjarin Fríði Dam Lindberg, sum fylgir Andriasi undir kappingini.
Andrias svimur sína seinastu kapping í Berlin leygardagin, tá hann fer á startin í 50 metrar frí.
Parasport Føroyar ynskir Andriasi hjartaliga tillukku við góðu úrslitunum og spennandi framgongdini.