Fimm føroysk met til Swim Open Tórshavn

Í vikuskiftinum var altjóða svimjistevnan Swim Open Tórshavn hildin í svimjihøllini í Gundadali. Kappingin strekti seg yvir tríggjar dagar – fríggjadag, leygardag og sunnudag – og var merkt av høgum støði, góðum stemningi og nógvum flottum úrslitum.

Hjá Havnar Svimjifelag var talan um eitt sera gott vikuskifti, har svimjararnir vístu seg væl fram bæði í innleiðandi riðlum og finalum. Nógv persónlig met vórðu sett, fleiri heiðursmerki vunnin, og fleiri svimjarar megnaðu eisini at kvalifisera seg til stórar altjóða kappingar.

Nevnast kann, at Silas Dam Lindberg megnaði kravtíðina til evropeisku juniormeistarastevnuna við einum sterkum avriki í 400 metra frí, har hann eisini betraði sítt persónliga met munandi.

Heili fimm føroysk met vórðu sett í kappingini:

• 50 m frí – Bartal Erlingsson Eidesgaard – 23,46 sek
• 100 m frí – Bartal Erlingsson Eidesgaard – 51,50 sek
• 50 m bringa – Bartal Erlingsson Eidesgaard – 28,81 sek
• 4x100 m frí – Bartal E. Eidesgaard, Óli Mikkelsen, Isak Brisenfeldt og Silas D. Lindberg – 3:35.89
• 4x100 m blandað – Bartal E. Eidesgaard, Óli Mikkelsen, Isak Brisenfeldt og Silas D. Lindberg – 3:57.61

Alt í alt eitt sera væl eydnað vikuskifti við nógvum góðum úrslitum, har Havnar Svimjifelag veruliga setti sín dám.

Sí úrslit frá kappingini her: https://live.swimify.com/compe...